Flugmódelfélag Akureyrar

Nú er vallarhúsið orðið verulega flott. Heilmikið lið af hörku köllum mætti í gær og málaði rauðleita fúavörn utaná húsði og setti nýtt gólf í það. Nú er það um það bil að verða nothæft. Þegar við vorum að taka síðustu pensilstrokurnar komu Arngrímur og Kristín, nágrannar okkar í Melbrekku, og gáfu okkur kampavín í tilefni af tímamótunum.

Annað kvöld, miðvikudaginn 8. júlí stendur til að setja glæra fúavörn á vallarhúsið. Ef nógu margir koma, þá verðum við enga stund að þessu og getum líka lokið við önnur smáatriði sem eftir eru. Á fimmtudag og um helgina er svo hægt að klára það sem eftir er og setja litaða fúavörn yfir þessa glæru.

Komið með pensla, dollur undir fúavörnina og módel.

Í dag voru ég, Kjartan, Mummi og Ásgrímur á Melunum að reyna að mjaka húsinu áfram. Það sem nú fékk áhersluna var þakið og þakpappinn. Hann er nú kominn á að mestu (nokkur blöð höfðu greinilega fokið út í buskann) og á morgun er ætlunin að klára það og gera húsið tilbúið undir fúavörn. Þeir sem vilja taka þátt mega láta sjá sig uppúr átta annað kvöld.

Það er ekki langt í það að húsið verði klárt. Í gær settu Gummi og Kjartan þakið á húsið og Árni, Óli og Gaui settu sólpallinn á. Á morgun ætti að komast langt með að ljúka því sem hægt er að ljúka núna. Ef margmenni mætir, þá er jafnvel hægt að taka til í kringum húsið líka.

Fjórir flottir mættu á melana í dag til að halda áfram að reysa vallarhúsið okkar, Gaui, Kjartan, Árni Hrólfur og Sveinbjörn (sem vantar á myndina). Höldum áfram á morgun!

Og bara svo allir viti það, við gátum flogið líka!ú

Módelmenn nú er komið að því að klára að reisa góðærishöllina okkar á Melgerðismelum og það vantar sárlega margar hendur til að klára þetta. Laugardagur og Sunnudagur 27 og 28 Júní hafa verið ákveðnir í þetta og vinnan byrjar kl 10:00 báða morgna og fram eftir degi. Takið með ykkur verkfæri og nesti. (og flugmódel líka auðvitað)

Stjórnin

20 ár eru liðin frá vígslu Flugstöðvar Þórunnar Hyrnu inná Melgerðismelum og ætlar hinn víðfrægi Flugklúbbur Íslands að halda kaffisamsæti miðvikudaginn 24 júní kl 20:00 og eru allir flugáhugamenn velkomnir. Mætum og njótum þess að vera í sveitinni kveðja Stjórnin

GH

Fyrsti fimmtudagshittingur á Melunum var í kvöld og það verður að segjast að hann heppnaðist alveg frábærlega. Þegar við komum inneftir um áttaleitið var stólparok af norðan, 20 hnútar og ekki minnsti möguleiki að fljúga. Þá var farið í að hella á könnuna og baka vöfflur.

Þegar vöfflurnar voru búnar og farið að minnka á könnunni hafði vindinn lægt í 10 hnúta og fljótlega upp úr því skall á dúnalogn. Þá voru módelin tekin fram og flogið til klukkan að verða ellefu. Árni Hrólfur prófaði nýjan Ugly Stik, sem flaug bara frábærlega.

Fleiri myndir á Fréttavefnum. Sjáumst næsta fimmtudag með módel og góð sköp.

Nú hefur verið ákveðið að halda félagsfundi í FMFA á Melgerðismelum á hverju fimmtudagskvöldi í sumar, út águst. Við ætlum að mæta á Melunum upp úr klukkan 20:00 og fljúga ef veður og birta leyfa, en annars verður hrært í eitt vöfflumix og hellt upp á könnuna.

Látið sjá ykkur og hafið góðu sköpin og módelin með.

Hún er orðin aðgengileg frá Internetinu, vefmyndavélin í Hyrnu sem vísar í norður. Veljið „myndir“ hér að ofan og „Vefmyndavél Hyrnu“ eða hreinlega smellið hér: http://flugmodel.is/myndavel/