Reglur vegna flugs fjarstýrðra módelflugvéla á Melgerðismelum, bæði fyrir fastvængjur og þyrlur.
- Aðeins þeir sem geta sýnt gilt félagsskírteini mega fljúga flugmódeli á Melgerðismelum.
- Þeir sem ætla að fljúga á Melgerðismelum skulu tilkynna í Akureyri Turn (s. 424 4360) að módelflug sé hafið og einnig þegar því lýkur.
- Ef aðrir eru þegar að fljúga skaltu láta þá vita af þér og athuga vandlega hvort einhver þeirra sé á sömu tíðni og þú áður en þú setur saman módelið þitt.
- Ef margir eru að fljúga, þá skal notast við tíðnitöflu félagsins. Gættu þess þá vel að kveikja ekki á sendinum þínum nema þú getir sett þína klemmu á reitinn fyrir viðkomandi tíðni.
- Notaðu flugbrautina aðeins fyrir flugtök og lendingar.
- Gættu þess vel hvort nokkur bílaumferð er á veginum á milli flugskýlisins og Hyrnu og frestaðu flugtaki til suðurs ef svo er.
- Ef þú ert ekki mjög öruggur að fljúga, fáðu þá einhvern reyndari til að standa hjá þér og segja til hvort nokkur er fyrir.
- Bannað er að standa á flugbrautinni þegar flogið er. Stattu alltaf austan við brautina og fljúgðu vestan við hana.
- Stattu alltaf þannig að áhorfendur og bílar séu fyrir aftan þig og módelið fyrir framan þig.
- Fljúgðu aldrei þannig að þú þurfir að snúa þér við.
- Fljúgðu aldrei lágflug yfir bílum, áhorfendum eða Hyrnu.
Þegar önnur flugstarfsemi er í gangi á Melgerðismelum skulu módelflugmenn halda sig innan sérstaks gátsvæðis sem hefur verið afmarkað (Sjá teikningu). Mesta flughæð módels yfir Melgerðismelum er 300 metrar (1000 fet).- Ef sviffluga er í flugi heim að flugskýlinu, þá verður þú að víkja tafarlaust, þannig að svifflugan geti lent heilu og höldnu.
- Ef mótorinn stöðvast á flugi láttu þá vita og þú færð forgang til lendingar.
- Ef þú ætlar að lenda úr suðri, gættu þess þá fyrst að hvort umferð er á veginum að Hyrnu. Ef svo er, bíddu þá með lendingu ef þess er nokkur kostur.
- Láttu aðra flugmenn og áhorfendur vita ef þú ætlar lenda með því að kalla það til þeirra.
- Þegar þú hefur lent, þá skaltu rýma flugbrautina eins fljótt og auðið er og láta aðra flugmenn vita þegar þú ert búinn að því. Taktu strax tíðniklemmuna þína af spjaldinu.
- Algerlega er bannað að aka flugmódeli með mótor í gangi inn í pitt. Dreptu á mótornum við hvítu merkin á akstursbrautinni.
- Þeir sem ætla að æfa vok-flug á þyrlum (hover) skulu gera það á svæðum merktum með grænum punktum á mynd.
- Flugmódeli með skjáflugsbúnað (FPV) skal flogið af tveim fullgildum félögum flugmódelfélags sem nota naflastreng. Flugmaðurinn sem stýrir módelinu á hefðbundinn máta skal vera með móðurstýringuna, skal hafa módelið stanslaust í augsýn og vera tilbúinn að taka yfir stjórn þess ef eitthvað kemur upp á. Skjáflugs flugmaðurinn skal nota aukastýringuna.
- Stjórnsvið módels í skjáflugi (FPV) takmarkast af sjónlínu flugmannsins með móðurstýringuna og skal að auki fara eftir því sem tilgreint er í reglu 12.
- Geymdu glannaskapinn heima – hann á ekki við á flugvellinum.
Reglur þessar voru samþykktar á félagsfundi 24. maí, 2012.
