Módelflug: Kafli 5

VÉLFLUG

UNDIRBÚNINGUR FYRSTA FLUGS

Kjartan Guðmundsson
Staudacher listfluga

Engin getur ímyndað sér þá eftirvæntingu sem fylgir fyrsta fluginu hjá öllum flugmönnum og einmitt þess vegna er góður undirbúingur mikilvægur.

Fyrst skulum við yfirfara nokkur atriði og gefa okkur góðan tíma.

  1. Var búið að festa allt vel?
  2. Var mótirinn tilkeyrður og prófaður á mismunandi hraða?
  3. Var þyngdarmiðjan örugglega á réttum stað?
  4. Eru rafhlöðurnar fullhlaðnar?
  5. Vinna öll stýrin rétt (líka í 20m fjarlægð án loftnets)?
  6. Er rétt blanda af eldsneyti tilbúin?
  7. Er startarinn eða gunguprikið tilbúið?

Ef svör við öllum þessum spurningum eru jákvæð þá má halda áfram....

  1. Veljum bjartan dag og lygnan (ekki yfir 2 vindstig).
  2. Veljum stóra flugbraut þar sem autt svæði er umhverfis.
  3. Veljum stað þar sem engar háspennulínur eru í nánd.
  4. Tryggjum okkur aðstoö kennara.
  5. Kynnum okkur að enginn noti sömu senditíðni og við.
  6. Verum vel upplagðir og höfum helst allan daginn fyrir okkur.

FLUGTAK

Þá er bara að setja í gang, aðgæta stillinálina, stilla flugvélinni upp á miðri braut móti vindi, aðgæta að enginn sé fyrir framan, gefa fullt afl og geysast af stað móti bláum himni... eða hvað..... gleymdist eitthvað? Jú reyndar, eitt smáatriði, sem sé undirbúningur flugmannsins sjálfs, hann gleymdist.

ÞAÐ MIKILVÆGASTA

Ef við hefðum ekki reynslu annarra til að byggja á værum við í miklum vanda með þennan kafla, og litlar sem engar líkur á að flugvélin næðist heil til jarðar aftur. Sem betur fer getum við hagnýtt okkur reynslu færustu flugmanna, Íslandsmeistara og heimsmeistara en síðast en ekki síst kennarans okkar. Við getum í huganum verið búnir að leysa fyrirfram flestar þær þrautir sem flugvélin leggur fyrir okkur um leið og hjólin sleppa flugbrautinni.

Hvað svo ef vélin lyftir sér ekki eðlilega eða flýgur ekki beint? Við réttum ekki bara kennaranum sendinn og gefumst upp... Nei við skulum velta fyrir okkur öllum hugsanlegum hrekkjum.

FYRSTU ÞRAUTIRNAR

A) Ef mótorinn stöðvast strax eftir flugtak þá höldum við beinni stefnu og reynum að lenda á brautarenda eða á besta stað þar framundan.

B) Ef vélin lyftir sér snöggt og steypist síðan niður þá reynum við að lyfta henni snarlega upp, en allar líkur eru samt á því að flugvélin sé með rangt stillt hæðarstýri, mótorinn of uppvísandi eða flugvélin of stélþung.

C) Ef flugvélin klifrar of bratt (meira en 45 gráður) eru mestar líkur á því að hraðinn minnki ört, þannig að til að forðast ofris (stall) verður að stýra nokkuð niður til að halda eðlilegum flughraða - ekki of snöggt niður samt. Byrjendum hættir til að ofgera leiðréttingar þannig að ein ofleiðrétting krefst annarrar á móti, betra er að byrja smátt og auka stýringuna eftir þörfum.

D) Ef flugvélin beygir til annarrar hliðar, er einfalt að rétta hana við meðan hún er á leið frá okkur.

FRAMHALD

Nú kemur að því að við viljum taka beygju svo að flugvélin fari ekki úr augsýn. Þá skulum við gæta þess að lyfta örlítið nefi vélarinnar með hæðarstýrinu um leið, því að hún leitar niður í beygjum. Því krappari sem beygt er, þeim mun meira leitar vélin niður.

Mjög góð æfing er að fljúga áttur, þ.e. feril sem næst tölunni átta í laginu. Hæðin skiptir ekki miklu máli - og þó, sumir segja að æfa skuli í tveggja mistaka hæð - en gott er að vera ekki svo hátt né langt í burtu að erfitt sé að greina hverja hreyfingu vélarinnar.

Fyrstu tíu flugin a.m.k. fara í æfingar, kennarinn sér um flugtak og lendingu til að byrja með, en síðan lætur hann eftir flugtakið og að síðustu einnig lendinguna.

ÆFINGIN SKAPAR MEISTARANN

Góður kennari gefur nemandanum stuttar leiðbeiningar meðan fyrstu flugin standa yfir og lætur langar útskýringar bíða þar til fluginu er lokið, enda þarf nemandinn á allri sinni athygli að halda og vel það.

Góður nemandi býr sig undir flugið með því að lesa allt það sem honum dettur í hug að komi að gagni og spyrja síðan þegar bókmenntirnar þrýtur.

Eftir að byrjað er að fljúga er bara tvennt sem dugir, æfing og aftur æfing.
Til bakaEfnisyfirlitÁfram
Úr „Módelflug“