Áður en hægt er að fá fullan kraft úr módelhreyflum verður að tilkeyra þá rétt eins og venjulega sprengihreyfla. Þegar maður kaupir nýjan bíl er manni ráðlagt að aka honum varlega fyrstu vikurnar til að vélin nái að slípa sig almennilega saman. Það sama gildir um módelhreyfla, nema hvað þeir eru ekki keyrðir hægt heldur eru þeir látnir ganga kaldir og eru þessar leiðbeiningar ætlaðar til þess að segja þér hvernig það er gert. Þær eru ekki til þess ætlaðar að segja þér hvernig tilkeyra á einhvern sérstakan hreyfil, því það er algjörlega óframkvæmanlegt. Hér er ætlunin að setja fram ábendingar um það hvernig best er að fara að til að hægt sé að ná sem bestum árangri. Frumskilyrði er að þú vitir hvað allir einstakir hlutar hreyfilsins eru kallaðir og því skaltu virða meðfylgjandi mynd vel fyrir þér. Næst skaltu festa hreyfilinn á 10-15 mm krossviðarplötu, eins og sýnt er á næstu mynd, ásamt eldsneytisgeymi, sem látinn er liggja á svampi (til að minnka titring) þannig að miðlína geymisins sé á að giska 1-2 cm neðar en eldsneytis-inntakið í blöndungnum. Þessa krossviðarplötu má annaðhvort negla á bekk eða búkka eða festa í skrúfstykki með sérstöku haldi eins og sýnt er á myndinni. Það má ALLS EKKI setja hreyfilinn beint í skrúfstykki. Gott er að hafa stífan vír í hraðastillinum til að halda loftopinu opnu. Þegar allt er tilbúið skaltu fylla geyminn af tilkeyrslueldsneyti (Long Life). Tvær og stundum þrjár slöngur eru tengdar við eldsneytisgeyminn. Ein liggur frá kúlu á endanum á slöngu innan í geyminum, til inntaksins á blöndungnum. Þessi kúla gerir það að verkum að hreyfillinn fær nóg eldsneyti, alveg sama hvernig flugvélin snýr. Önnur slanga liggur frá röri, sem sveigt er upp á við og verkar sem yfirfall, upp á nippil sem oftast er fyrir hendi á hljóðdeyfinum. Þetta gefur bakþrýsting á geyminn og sér til þess að hreyfillinn fái allt það eldsneyti er hann þarfnast. Ef þessi nippill er ekki fyrir hendi má ekki setja tappa á þessa slöngu. Þriðja slangan er til þess að fylla á geyminn og er settur tappi í hana að áfyllingu lokinni.
Nú skaltu skrúfa blöndustillinálina alveg inn og síðan 3-4 snúninga út aftur. Oftast er eitthvert hak á henni til að betur sjáist í hvaða stöðu hún er. Síðan skaltu setja fingur fyrir opið á blöndungnum og snúa loftskrúfunni hægt rangsælis til að soga eldsneyti upp í eldsneytisslönguna. Ef geymirinn er í réttri hæð, rennur þetta eldsneyti ekki til baka úr slöngunni. Nú skaltu gefa hreyflinum "snafs", það er gefa honum nokkra dropa af eldsneyti inn um opið á blöndungnum eða inn um pústið, beint inn á strokkinn. Nú skaltu tengja startrafhlöðuna við glóðarkertið og "heddið" á hreyflinum og snúa loftskrúfunni snöggt rangsælis. Til að þetta takist sem best er gott að festa loftskrúfuna þannig á að þegar hreyfillinn fer að þjappa þá sé loftskrúfan í sömu stöðu og vísarnir á klukku þegar hún er fimm mínútur yfir sjö. Oftast þarf að snúa nokkuð oft áður en hreyfillinn fer í gang, þannig að ef þetta tekst ekki í fyrstu tilraun skaltu ekki hafa áhuggjur, þolinmæði er það sem þarf. Eftir að hreyfillinn er kominn í gang skaltu standa fyrir aftan hann til að forðast að setja hendina í loftskrúfuna ef eitthvað þarf að stilla. Stilliskrúfan fyrir hægagang er ekki stillt fyrr en eftir að búið er að tilkeyra. Það er gert þannig að hreyfillinn er látinn ganga hægagang og skrúfan síðan skrúfuð inn eða út eftir því sem við á (mjög varlega með löngu skrúfjárni), þangað til jöfnum og öruggum hægagangi er náð. Venjulega er þetta þó ekki gert fyrr en farið er að fljúga, því mjög er undir ýmsu komið (loftþrýstingi til dæmis) hvernig þessi skrúfa er stillt. Einnig getur verið stórhættulegt að stilla hægaganginn og því vissara að hafa vanan mann til að gera það fyrir sig. Þegar búið er að láta hreyfilinn ganga út af einum tanki má skrúfa stillinálina örlítið inn (ca 1/8 úr snúningi) og láta hann ganga aftur. Eftir samtals ca 40-50 mínútna gang ætti hreyfillinn að vera full tilkeyrður þannig að hægt sé að láta hann ganga af fullum krafti og þar með er hægt að fara að fljúga.    |
Úr „Módelflug“ | |||||
